Yera una vegada una viesca perguapa y nella vivía un esguil mui simpáticu, solidariu, trabayador y... músicu; pues sí, anque paeza un oficiu de persones esti esguil deprendió a tocar la xiblata ensin dir a denguna clas y nun sabía lo que yera una partitura pero tenía una sensibilidá especial pa sacar soníos melgueros de la so flautina y d’esi mou ponía gayola na vida los otros animalinos de la viesca.
Pero caberamente la esistencia taba volviéndose abegosa enforma por aciu d’una menaza qu’entamare delles selmanes denantes l’aniciu la seronda y repetíase tolos domingos: yeren ¡¡¡ los cazadores!!!; sí, eses persones que dicen que-yos presta cazar pa divertise cuando hai tantes coses que se puen facer ensin matar a naide como lleer, montar en bici, dir d’escursión, xugar a bolos, al castru o cascayu y una carrapotá de coses más.
Yá nun podíen aguantar más que mataren animales de contino, sobre too piquiñinos, porque entovía nun yeren quien a correr muncho y cuando los sos pas y mas golifatiaben nel aire la presencia los cazadores y los perros, echaben a correr lo mesmo que voladores, pero munchos d’ellos caíen pel camín y dempués yera una pena y un duelgu ver berrar a los raposos, les llobines, los xabalíes, los coneyinos tan prestosos, porque-yos mataron los fíos y de tan atristayaos que taben, nun yeren quien p’atacar a esos cazadores tan malos..., amás, si diben tres d’ellos, igual-yos mataben tamién, anque preferíen los piquiñinos.
Dellos díes dempués la viesca paicía vacia; nin siquiera los paxarinos que denantes canciaben munchu y dacuando acompañaben al esguil faciendo una mena d’orquesta, teníen gota gana d’abrir el picu y nun se vía más qu’animales yendo al debalu o echaos en suelu mirando unos pa otros colos güeyos enllenos de llárimes.Tando asina, entamó falar un osu enorme a quien na cabera cacería mataron-y la muyer y el fíu.
-Collacios y collacies, énte esta situación tan llaceriosa lo único que se me ocurre ye atacar a esos seres, porque nun son persones, d’esmenu; ellos vienen el domingu, tenemos seis díes pa pensar que vamos facer y qu’enxamás nun vuelvan a matanos la familia..., -el probe quedó dellos minutos coles llárimes coligando de los párpagos pero dempués d’un suspiru mui llargu, siguió: a mín paezme que podíamos pasar tola nueche’l sábadu enriba los árboles y cuando apaezan el domingu pela mañana, ¡¡PLUM!! tiranos pa contra ellos; claro, ya sé que nun ye mui fácil esguilar pa los árboles y yo menos, colo que peso, pero ayudándonos unos a otros..., yo puedo facer d’escalera y llueu ente unos cuantos tiráis de mín pa subime...
-Nun paez mala idea -dixo una raposina yá mayor, a quien tamién-y mataren la fía y l’home quedando sola con un nietín- pero ellos tienen escopetes y si ún d’ellos escapa, pue ponese a tirar, tamién tán los perros y nesi xareu a lo meyor unos tienen suerte, pero otros que yá tamos vieyos, nun somos quien a defendenos, saber y poder atacar...¿nun ves, osín -dixo mirando pal osu grandón- que nesta viesca nun tamos avezaos a defendenos de dengún peligru porque hasta agora, naide nun vino matanos? Lo que se me ocurre –siguió la raposa-, ye facer un túnel p’amataganos, -énte la mirada de plasmu, ella siguió-: sí, cavar ente toos un túnel mui, mui llargu y fondu y entós metenos nél cuando vayan llegar esos homes tan malonos.
Un llobu xoven que salvare dos vegaes la vida de milagru dixo:
-Ta perbien lo que dices pero ¿cómo taparemos la entrada’l túnel?, porque amás, los perros tienen un ventu perbonu y acabarán descubriéndonos.
La raposina tenía los güeyos enllenos d’agua y entós el llobu entamó afalagala cariciándola cola patuca: Nun berres, raposina, nun berres, la to idea ye perbona –miró al rodiu y tolos animales dixeron : ¡¡¡¡ SÍÍÍÍ!!!!- pero tampoco nun sé como facer pa que nun se vía la entrada’l túnel,a lo meyor tapándolu con fueyes...
-Esperai, esperai –saltó una coneyina xoven, pero mui gorda porque yá-y faltaba pocu pa ser ma- lo de les fueyes paezme mui afayadizo pero faciendo un texíu con elles...
El so home nun la dexó finar:
-Un texíu?. ¿Qué quies dicir?.
-Si me dexares esplicame –enfadóse la coneyina, espetando los güeyos nel coneyu que baxó la tiesta, un plizcu avergoñáu porque sabía de sobres que la so muyer yera mui llista- lo que se me ocurre ye que, con toles fueyes y rames qu’hai agora na viesca porque tamos na seronda, podemos facer como un texíu mui, mui gordu que tapare la entrada’l túnel y tamién tol espaciu onde vivimos, la escuela los neños,les nueses cases...,entós, durante la selmana tenémoslu guardáu y el domingu pela mañana sacásmolu pa que tape too dempués d’amataganos...claro que...-quedó mirando pa toos que tamién miraben pa ella mui atentos- ¿cómo vamos tapamos si yá tamos dientro’l túnel?.
Con una cara enllena d’esmolición, faló l’osu:
-Tenéis unes idees perbones, la raposina col túnel, el llobu colo de tapar la entrada con fueyes y la coneyina con facer un texíu pero agora necesitaríamos daquién que lu tapare y naide nun pue quedar fuera porque entós morrería...
De secute, l’esguil músicu, gayasperu y simpáticu. saltó metanes tolos animales aconceyaos en redondel:
-Los esguiles esguiladores,
solidarios y curiadores,
garramos el texíu
y llanciamoslu de seguío...
Una montonera de güeyos estremaos espetáronse nél, espeyando plasmu, ensin saber que quería dicir esti esguil tan puñefleru.
-Escuchái, escuchái –l’animalín saltaba d’ún a otru ximielgando les manines, parándose un migayu pa sacar soníos melgueros de la so xiblata, ufriendo sonrises misterioses a tolos animales y faciendose l’interesante.
-Mentantu tabeis toos ehí cavilgando como tapar la entrada’l túnel los mis collacios y yo tuvimos una idea afayadiza, a ver que vos paez: allugamonos nos carbayos pente les fueyes garrando ente toos los bordes del texíu; nel momentu que los cazadores y los perros entren na viesca...¡¡¡¡ZASSS!!!!, llanciamoslu y de xuru que’l furacu’l túnel queda tapáu dafechu.
A la par que l’esguil xiblateru esplicaba’l proyeutu, los otros esguilinos diben entrando nel conceyu mirando pa toos un rispiu tímidos y avergoñaos delantre animales tan gradonos como’l gochu xabaz, l’osu; de secute, dempués dellos minutos de silenciu, un españíu d’aplausos restalló nel aire.
Mui bien, mui bien –dixo ma coneya-, quien nun tea d’alcuerdu cola propuesta que llevante la pata –como nun se llevantó denguna pata la idea diose por bona.
-¿ De qué manera vamos amatagar el golor? -faló la raposa-. Los cazadores nun se decaten d’ello, pero los perros namái entrar van aventase pa contra’l túnel porque: ¿maxinaivos como arrecenderá ellí dientro?.
La murnia tapeció aquelles cares que dalgunos minutos denantes taben risones y confiaes.
-Tamos como al principiu –dixo l’osu- esto nun hai manera d’igualo.
-Lo que voi proponer toi ciertu que va parecevos una gochería –dixo’l llobu- pero pémeque nun tenemos otra xida y ye ésto: axuntar los cagaritos de toos nós y mecelo cola fuyaraca’l texíu; d’esa manera los perros van tracamundiase y si tamién echamos cagaritos por tola viesca andaranla toa ensin atopanos; si sal bien y el mecíu de los escrementos cola fuyaraca ta calcao enforma pa que nun se destape’l furacu, salvamos; esto pue ser una esperiencia, collacios y collacies, tampoco nun ta perclaro que vaya a furrular pero ye lo que se me ocurre, si daquien tien una idea meyor...
Tenía razón el llobu: o facíen eso o en dalgunos meses munchos animalinos d’esa viesca diben desapaecer.
Quedaba por alcordar como enterase de cuando llegaben los cazadores; entós los esguiles que yeren llistos como la fame propusieron que los llobos namái goler que s’averaben, avisaríenlos pa darréu esguilar a los carbayos y entós el xiblateru tocaría la xiblata con soníos apautaos pa que tolos animales entraren de seguío al túnel y namás tar toos dientro, allanciar el texíu.
Trabayaron tola selmana de manera tala que casi nun-yos daba’l tiempu pa buscar comía pero’l domingu, ceo pela mañana, los corales los animalinos baltaben tan fuerte que casi-yos mancaben y pasu ente pasu too furruló perbién pa ellos: el llobu acertó goliendo a los cazadores, los esguilinos tuvieron arribones los carbayos nel momentu satu, la música apautada oyóse perfecho y el texíu de fuyaraca y cagaritos fexo’l so llabor d’amatagalos; de toles maneres, hai que dicir que los animalinos dientro’l túnel taben espavoriaos oyendo les pisaes de los cazadores y los sos glayíos de tar enfadaos; estos homes diben al debalu, menazando los perros, comentando ente ellos u taríen los dichosos animales, yendo a la gueta d’unos seres irracionales pero que supieron mui bien defendese de les escopetes.
Nel tapecer, cuando los esguilinos yá vieron alloñase de la viesca a los cazadores colos perros, llevantaron el texíu y entós foi un españíu de gayola, por dos coses: taben vivos y el plan dió resultáu. Lo llargo delles selmanes siguieron faciendo lo mesmo, pero cuando la noticia lo que pasaba na viesca lllegó hasta los periódicos, les autoridaes nomaron a la viesca espaciu protexíu poniendo guardes forestales pa qu’enxamás nun volvieren a entrar cazadores nella. De magar, la vida pa los animales foi tranquilina, faciendose nueves pareyes, ñaciendo, esporpollando y deprendiendo los piquiñinos, como tien que ser la esistencia en cualesquier sociedá civilizada, seya de persones o animales.
Pero l’esguil taba un pocoñín deprimíu porque tenía l’enfotu deprender tocar un instrumentu más que la xiblata pero nun sabía cual escoyer porque anque-y prestaba enforma’l piano paicía-y que yera demasiao grande pa él y entós pensó que sedría meyor tocar les maraques que les conociere porque na viesca teníen cine y un día nuna pelicula salíen les islles del Caribe y negros y negres tocando les maraques asina que camentaba y camentaba como facer una maraca y onde atopar el material porque nun quería estropiar dengún árbol.
Yera un día de branu que cayíen los páxaros de calor y l’esguil, dempués bañase en ríu, sentóse embaxu un carbayu y pensando na dichosa maraca quedó pigazando.Tando asina entamó suañar con una noz gordona, gordona, de les qu’él y los sos collacios esguilinos comíen;.pasín a pasín, la noz camudaba nuna maraca semeyada a les que viere en cine y de seguío una rama del nozal espetóse nella pa facer el rabil; sonrió y nesi momentu pasaron perhí la familia los coneyos y viendolu d’esi mou dixo ma coneya:
-Mirái que bien pigaza l’esguil, probín, ta cansáu llueu de tar les caberes selmanes tresnando la casa pa l’iviernu.
-Ye verdá –dixo ún de los fíos- amás, alcuérdome de lo que contasteis cuando el y los sos collacios trabayaron tanto pa que los cazadores nun vos garraren.
La familia coneya siguió’l so camín y agora l’esguil suañaba colo que diba poner dientro la maraca pa que fexere un soníu melgueru porque metanes el suañu remembraba un documental que viere nesi cine que teníen na viesca au salíen les playes del so país col sable apináu de conchuelines, bigaros, xigues piquiñines... y gavilotes.
¿Y si una d’eses gavilotes tan precioses qu’esnalen tan bien-y truxere nuna corexina un montonín d’eses conchuelines, bígaros y xigues pa poner na maraca?.
Al empar que l’esguil suañaba con un instrumentu nuevu, una gavilota gayaspera diba’l debalu per una playa. A la probina mancaba-y el butiellu porque caberamente l’agua la mar taba emporcándose toa por aciu la refugaya que muncha xente tiraba a l’agua y tamién poles motos acuátiques y como nun atopaba alimentu n’otru llau tenía que comer lo qu’hebía per ende que yera poco y ruino.
Nun prau xunto a la playa, un perrín mui prestosu taba fozando la pación a la gueta yerbes que-y curiaren l’estómadu; cuando la gavilota lu vió entrugó-y que facía y él esplicó-y pa lo que yera; entós ella dixo que quiciás fuere bono pal so butiellu pero’l perrín retrucó-y que’l meyor remediu diben ser les yerbes que s’afayaben nuna viesca que nun taba mui lloñe y él tenía dío ellí colos sos amos y los fíos que mentantu falaben el perrín y la gavilota taben na playa; tamién-y dixo que cuando llegare a la viesca entrugare pol esguil músicu que yera una animal mui bonal y solidariu porque de xuru-y buscaría les yerbes, dió-y les señes, la gavilotina les gracies y anició esnalar.
Pero llueu d’un cachu pergrande la probina taba mayada y yá nun podía más porque'l perrín dixo-y que la viesca nun taba lloñe pero él diba nel coche los amos y la gavilota esnalando que ye lo mesmo que caleyar pa los humanos, pero tuvo suerte porque vió averase un autocar d’escursionistes que ponía enriba’l parabrises: “A la viesca guapa” y entós decidió que lo meyor yera acoricase nel techu y cuando llegaren echase en suelo. Cuando se posó casi nun yera p’andar porque ente’l viax y que yera la primera vegada que taba nuna viesca viendo animales tan grandonos, amoriaba perdafechu, asina que tuvo un pocoñín mirando pa los llaos, un rispiu amedranada cuando vió averase a ella un osu grandón, (Ai, mamina, pensó, enxamás nun supe qu’hebiere animales tan escomanaos, ¿viendrá comeme?).
-Hola, gavilotina, porque yes una gavilota, ¿verdá?-entrugó sorriendo l’osu- equí nun hai pero sabemos de vos poles películes que vemos en cine...,¿qué te pasa, tas malina, busques a daquién?.
La gavilotina, un gotu más confiada por atopar un osu tan educáu, retrucó:
-Si, duelme munchu’l butiellu y un perrín mui simpáticu que conocí na playa onde yo vivo, dixome que viniere equí porque de xuru habría yerbes pa curame y que l’esguil músicu podría apurriameles, ¿sabes tú au ta?. -Tará descansando cerque la so casa porque estos caberos díes tuvo munchu trabayu pero toi ciertu que sedrá quien p’afayate les yerbes que necesites.Cuando l’osu y la gavilotina llegaben onde taba l’esguil, esti acababa despertase y cuando vio la gavilota arremelló los güeyos de manera tala que paicía nun diba poder pesllalos yá nunca.
Ye..ye..ye.. ¿yes de verdá?, porque agora mesmo suañaba contigo, l’esguil enderechóse, averóse a la gavilota y mirabala clisáu ¿viniste esnalando, cómo aportaste?.
La gavilotina, que pasín a pasín avezábase a los animales la viesca, esplicó-y pa lo que vino; pel so llau, l’osu, pensando que yá cumpliere, faciendo que l’esguil y la gavilota se conocieren, despidiose d’ellos y siguió’l so camín.
-Ta llueu osín, ta llueu, -dixo la gavilota-¿que bonu ye verdá?.
Si, probín, cuando viníen los cazadores equí mataron-y la familia, a ver si en dellos meses ye quien p’atopar parexa, porque agora ta mui triste.
Darréu los dos animalinos apautaron la xera que diben facer: él diría a la gueta les yerbes que la gavilota necesitaba y ella volvería a la playa pa trayer les conchuelines, les xigues y los bígaros.
Una selmana dempués, la gavilotina, que yá conocía’l trayeutu los autocares d’escursionistes, llantose nel techu d’ún d’ellos; agora si que llevaba una carrapotá de coses: con un oriciu fexo una triba corexa y punxo dientro tolo que l’esguil quería y tamién un pexe que, como yera piquiñicu, un pescador mui enchipáu namái pescalu llanzolu pa la mar y ella acertó a pañalu de milagru. Pa colingar l’oriciu del pescuezu ató-y una cinta d’ocle gordono y mui verdi. Cuando llegó en casa l’esguil, ésti quitó-y la colgadiella porque la probina tenía el piscuezu estrapayáu de tantu pesu y quedó plasmáu de ver tolo que-y apurriare:
¡¡Qué maravía!! –dixo l’esguil- mira gavilotina, mira toles yerbes que te pañé.
Mirabense toos dos emocionaos; entós l’esguil fizo-y un ferviatu a la gavilota pa qu’aselara dempués del viax y dixo-y que s’echare na so camina pa pigazar.
Mentantu, l’esguil punxo dientro la noz gordona tolo que-y truxo la gavilota (menos el pexe que llimpiólu y guardólu pa cenar) zarrió la noz con resina y tamién el palu de nozal pa facer de rabil; probó un migayu pa sentir el soníu pero paró pa nun esconsoñar la gavilota. De seguío fizo unes casadielluques, frió’l pexe y cuando ya tuvo too tresnáo despertó a la gavilota; a ella prestó-y pola vida lo curioso que taba too; cenaron mui bien y cuando finaron, l’esguil dió un conciertu de xiblata y maraca a la par.L’amistanza ente los dos animalinos caltúvose munchos años porque la solidaridá y el respetu mutuo tien d’esistir ensin qu’abulte una migaya el sexu, la edá o’l color de la piel.
ACABOSE