Había una vegada tres gatinos hermanos y amás trillizos pero nun s’asemeyaben una migaya.
Xelín yera grandón, gordu, gordu, de lo más gordu, col pelu blancu y espesu que dacuando recordaba’l d’un osu. Los sos güeyos yeren nidios, casi tresparentes.Colín taba esturniau dafechu. Tenía la pelleya mariella con rayes prietes enriba; pequeñucu y ruinu, sólo los güeyos, verdes como la mar y unos bigotonos prietos y enormes rellumaben nesti gatu nanu.
Talín yera prietu, col pelu llargu y perguapu; nin tan grandón como Xelín, nin tan esguiláu como’l so hermanu pequeñu, yera gayasperu, coles pates llarges y los güeyos como les fueyes de los árboles cuando entamen biltar na primavera.
Vivíen xuntos nuna casina curiosa que-yos iguaron la pescadera y el confiteru que teníen los sos negocios xunto a la casina, y como los gatinos echaben-yos una gabita yendo a la gueta los mures y tamién acarretando les caxes, porque eses dos persones yá yeren mayores , pues daben-yos pexe y pastelinos.
La vida ellí yera prestosa y pacetible hasta que la cai onde ellos vivíen entamó a emporcase porque munches persones vecines d’ellos nun respetaben les normes de llimpieza; tiraben pel suelu plásticos, colilles, papeles y hasta azotaben les bolses de basoria peles ventanes en cuenta de poneles cabu’l portal porque enagora nun esistíen los contenedores.
-¡Yá ta bien! -dixo Colín- nun faigo más que posar los pies en suelu y yá toi esnidiando en cualesquier cosa: barru, la porquería los perros...-miró pa los sos hermanos que-y dixeron “sí” cola tiesta- que nun sé porqué los amos nun-yos ponen daqué pa facelo enriba en vez d’en suelu; la nuesa cai ta fecha una corripa.
-Ye verdá -afirmó Xelín- porque vós podeis quexavos pero yo, que tengo les pates blanques, nun les veo enxamás d’esi color y de tanto fregales tolos díes voi quedar ensin pelos.
-Teneis razón -respondió Talín- anque pasen los barrenderos, y el camión de la basoria, la xente portase talo qu’una gocha, nun sé que podiamos facer pa que les persones s’avezaren a ser curioses.
Lo peor nun ye eso –retrucó-y’l so hermanu mayor –sinón que van diciendo que los neños nun nos pueden cariciar nin averase a nós porque,como tenemos malures na pelleya igual s’infesten y ponense malos; eso ye una mentira bien gorda, nós tamos llimpios y persanos, enxamás tuvimos dalgún mal... quiciás un catarrucu. Pero malures na pelleya... ¡eso ye demasiao! –acabó Xelín y los güeyos echaben fumu verde como azufre.
Quedaron los tres mirandose ente sí, camentando que yá aportare’l momentu d’atopar una solución pa que la so cai tuviere llimpia, porque tampoco yera cosa de dir a la gueta d’otra casa fuera’l so barriu, tal y como taben les coses.
Como yeren trillizos y ocurriense-yos les idees al mesmu tiempu, pasó que los tres abrieron la boca a la vez pa falar; entós dió-yos la risa y cuando pararon echaron a ver a quien-y tocaba ser el primeru. Foi a Colín.
Ésti, convencíu como taba de ser ruinu y poca cosa, quiso dase importancia polo menos cola voz, asina qu’esclarió la gargüela, dio-y tono talo que d’orador y dixo:
-A min paezme que la manera pa que la xente faiga casu ye colos anuncios...-los sos hermanos miraron pa él daqué estrañaos- Si, home, sí, nun veis eso que sal na tele que diz que’l fumar ye malo pa la salú y que nun se queme la viesca... pues daqué asina, que curien la cai, que nun tiren refugaya, coses paicíes.
Como Colín finó, echaron a suerte entre Xelín y Talín y tocó-y a esti:-Nun ta mal eso Colín, nun ta mal, pero ya veis que la xente sigue fumando y que les viesques quemense tolos branos, asina que nun sé... amás, como somos gatos ¿qué manera teníamos de dir a la tele a proponer coses? Arriendes d’eso, los vecinos d’esta cai van decir que somos unos trapaceros, que los perros riesguen les bolses... Xelín atayólu rápidu:
-Y gatos tamién, manín, y gatos tamién, lo que pasa que nós somos d’otra triba, probes pero llimpios, amás, alcordaivos que tenemos perros amigos, el del garaxe y la perrina que-y morrió l’amu.
Quedó mirando pa los sos hermanos y estos pa él, cavilgando que les persones yeren muncho difíciles d’educar. De secute, Colín pegó un blincu qu’asustó a los sos hermanos pero denantes que-y entrugaren qué asocedía, yá taba él falando como una maquinona tren:
-Ya sé, ya sé –nun dicía otra cosa y el so cuerpu ruinu, encoyíu en si mesmu, ximielgandose d’un llau pa otru, asemeyaba un duviellu mal fechu; por fin paró de saltar y quedó quietu, colos güeyinos verdes rellumantes como yerba tempranero-. Puen poner calderos, claro, hermaninos, y asina, nin perros, nin gatos, nin neños andarán con elles.
Talín nun dixo ná, pero Xelín quedó mirando pa él, al tiempu que llambía la pata drecha; seliquino, pero con daqué superioridá, retrucó al so hermanu:-Nun me paez una bona solución, porque tamién puen emburriar los calderos y cayer al suelu y tamos igual; ta bien la idea, si, -dixo mirando pa Colín qu’empicipiaba enfocicase- pero si hebiere otra cosa más grandona que los calderos, que nun cayere a emburiones y quedara afitao en suelu...
Una triba de caxa ...-la voz de Colín sonó fonda; despaciu, como falando pa él solu, siguió darréu, -una caxa grandona, fecha de fierro, eso ye, fuertona, que nun se ximielgare, ¡ miaaaaauuuuu!, qué llistu qué soi –y daba golpes en pechu lo mesmo que faen los monos.
Xelín y Talín abrazaron entusiasmaos al so hermanu:
-Qué intelixente yes –dicía Xelín. -¿Cómo se te puen ocurrir eses coses?
Y Colín, ente avergoñáu y orgullosu, facía como si la so idea nun fuere una cosa mui importante.
-¿U ta’l fierro? –espetó de secute Talín-, porque, de mano, nun lo tenemos y arriendes d’esto pesa mucho pa nós, nun tendremos fuercia p’acarretalo.
-Podemos garralo nel cementeriu coches –arrespondió Colín que paicía tar inspiráu esi día-; ellí hai muchos cachos grandonos y quiciabes puean echanos un gabitu los nuesos amigos, el perru’l garaxe y la perrina.
Quedaron los tres callaos, pensatibles y enseguida entamaron la xera; avisaron al perru y la perrina y ente toos arrastraron planches de coches esgonciaos, pusieron una pa fondu y facien turnos pa dir pol fierro y a la vez xixilar lo que yá se traxere; sudaron abondo y cansaben; dacuando teníen que parase pa beber agua, pero rápido siguíen el so llabor, cola ilusión de saber que taben faciendo daqué valoratible, non namái pa ellos sinón pal barriu; quiciabes, tamién ensin qu’ellos lo supieren, pa enseñar a les persones a portase como tal.La xente que pasaba taba estrañao y nun atalantaba un res de lo qu’asocedía; asina y too, hebo dellos babayos qu’enxamás curiaben na del barriu, que nun s’esmolecíen un migayu, si la cai taba llimpia o puerca, pero como teníen rabia a tolos animales y namái los queríen pa saca-yos provechu, perros pa cazar y gatos pa dir a la gueta los mures, avisaron a los municipales como si pasare una desgracia.
Los guardies, que taben fartucos de ver los gatos y los perros caleyar per ende ensin estropiar res, nun-yos ficieren munchu casu y al tapecer, pa facer la vuelta diaria, pasaron pela cai y entós, ¿qué foi lo que vieron? De mano quedaron plasmaos dafechu y dempués emocionáronse, enllenos de tenrura, cuando vieron que los tres gatinos, el perru y la perrina ficieren una mena de contenedor y diben posando les bolses que taben metanes les aceres.
Aquel tapecer foi una fiesta; los seres humanos, grandes y pequeñinos, rapacinos y mayores aplaudieron a los animales, camentando que, dacuando, estos son mas civilizaos que les persones y dende aquel día nun-yos faltó cebera diario y casina caliente n’iviernu.
Y asina, ecoloxista y curiosino, fina’l cuentu los gatinos.
