Na mió ciudá hai munchos parques y casimente toos tán enllenos d’árboles guapos, flores de milenta colores y caparines qu’apaecen de secute nel entamu la primavera.
Pero hai un parque que ye’l más prestosu porque paez una viesca; y la xente pue sentase nos praos y los bancos son de maera suavino al palpuñalos y non de piedrona frío y como ta a la veriquina mio casa, voi ellí abondo vegaes.
Ye una preciosidá ver surdir les fueyines a los carbayos, los nozales, les castañales y pa detrás son grandonos y presta ponese na solombra pero...
Pero hai otros arbolinos que quiciás nun seyan tan gayasperos nin fuertes nin nos apurrien frutos enllenos de tastu y ensin embargu tienen un aspeutu sele, dulcino, asonsañando una xana echando’l so pelu na tierra.
Pues sí, ye’l salgueru; como si tuviere una melena perllarga fecha de rames verdes.
El probe salgueru nun-y abultaba una migaya’l xardineru; esti home nun yera mala persona pero si muncho remungador y como nun-y daba muncho valir al probe arbolín, malpenes lu podaba nin curiaba, nin arrancaba la yerba malo que-y espolletaba al rodiu.
Magar entós, el salgueru, que de mano yá ye berrón, al vese desdexáu, púnxose berrar, berrar, berrar.
De resultes los berrios y lo que llovió por él una nueche entera, les rames esporpollaron de manera tala, qu’acabaron enguedeyándose na pación del suelu. Pela mañana, el parque yera una romeria, folixa pa grandes y piquiñinos, porque de boca oreya espardióse la noticia de lo que pasaba. Y entós, sí, entós el xardineru neciu, avisaos pelos vecinos, llegó a carrenderes al parque, enfotandose darréu n’arrancar les rames perafitaes na pación. Pero nun foi a ello y arriendes, la xente’l barriu, cenciello, tranquilo, curiador de la natura, intentó esplica-y que yera una prestancia miralo, daqué orixinal, como nunca se viere, porque’l salgueru, al doblase asina, garráu como taba a la pación, facía una triba d’arcu.
Cuando entendieron que’l xardineru nun facía gota casu, enfrentaronse-y con menaces y los rapacinos y rapacines fexeron un corru al rodiu, nun dexando al xardineru nin siquiera un furaquín pa pasar. De seguío llegaron los municipales que taben de guardia y al ver el salgueru quedaron plasmaos, sofitando’l paecer de los vecinos; pa enriba dixeron-y al xardineru: -Ye un orniu más del parque y nun dará más trabayu que denantes.
D’esi mou decidieron facer conceyu abiertu y roblaguín a roblaguín, ente toos, llograron convencer al xardineru qu’el parque taba ainda más prestosu col salgueru asina. Dellos díes dempués, llantaron-y una estaquera alredior pa caltenelu curiosu; el xardineru, que caberamente nun taba tan roceanu, foi, pasín a pasín tratandolu con ciñu y pasaes dalgunes selmanes, el salgueru agradecíu y contentu, púnxose gayasperu y les sos fueyes, mui verdes, semeyaben tener lluz dientro de tan rellumantes que taben.
ACABOSE