Yera una vegada una escuelina d’aldea onde los escolinos y escolines teníen una mayestra que se llamaba Tina y ún de los sos porgüeyos yera caltener les tradiciones del so país y deprende-yles a los rapacinos y rapacines anque tamién-yos ensiñaba Llingua y Ciencies Naturales.
Esta rapaza tenía muncha afición a conocer los cámbeos de la Lluna, la so influencia nes marees, nes muyeres cuando tán pa dar a lluz, etc; poro, na metada del mes d’Avientu, decatóse qu’el solsticiu d’iviernu coincidía cola lluna llena que taría más cerque la Tierra, más allumada pol Sol y por aciu too esto, veríase más rellumante y redonda.
Tina, que conocía munches hestories pervieyes del so país, inda más vieyu qu’eses hestories, decidió camudar por unos dies el programa escolar y cuntar a los escolinos, el rellatu oyíu de los llabios d’una bisgüela de só a quien-ylu cuntaría quiciás un güelu y a esti la ma, el pa...
Esi día, 22 d’Avientu, col cielu buxu y lluz grisono, Tina anició cuntar la lleenda los sos antepasaos que foron tamién los de los sos escolinos:
El primer día de solsticiu d’iviernu, los Celtes celebraben la fiesta del YULE y entós llantaben antorches el llargor los caminos, prendíen fogueres de maera de carbayu nes cruciaes y poníen veles nes rames los texos pa qu’el sol, que yá colaba porque yera dómina d’iviernu, nun se perdiere pel camín y fuere quien a volver na primavera.
Como daquella nun había lluz llétrica, los homes y muyeres celtes espetaben pegoyos en suelu afitando enriba de tó les antorches, los neños y neñes ataben ente los pegoyos tires de cueru feches cola pelleya los animales y ehí afitaben veles pequeñes anque tamién les poníen nos árboles que yeren casimente toos texos y carbayos.
-¿Y cómo nun amburaben les rames y les fueyes los árboles? -entrugó Endrín, un guah.e llistu como la fame-.
-Ye verdá, ye verdá -agora Deva, la so collacia de mesa y tamién d’asientu nel autocar escolar, sofitaba l’entrugue d’Endrín y siguía-: A lo meyor tas cuntando una mentirina ¿eh, profe?, lo de los pegoyos pues igual sí, pero’l fueu nes rames...-y quedó asina, cola güeyada espetada na cara risona de la mayestra-.
Ésta anició poner orden porque yá taben los escolinos muncho alteriaos:
-¡Callái y tai quietinos! Agora voi esplicavos como facíen pa que nun amburaren les rames y les fueyes, lo que tanto-yos esmolez a Deva y Endrín.
Los Celtes, arriendes de trabayar el metal y l’acebache, facíen pieces de cerámica, zapiques, xarres, escudielles, pa xintar, pa beber..., poro, fabricaron una triba vasinos como si fueren cilindros con un furacu en cada llau; entós llantaben la velina dientru’l cilindru y pelos furacos metíen les cintes de pelleya d’animal pa colingalos nes rames; d’esi mou l’árbol taba allumáu enforma y nun había pelligru d’incendiu...-quedó dellos segundos mirando pa tolos escolinos con una güeyada un plizcu lladina y nos llabios el dibuxu d’una sonrisa prestosa y entrugó sele-:
-¿Qué vos remembren esos árboles enllenos de lluz?; a ver, a ver...
Los rapacinos y rapacines miraben unos pa otros, oyíase un xiu-xiu, soltaben risines ñervoses, poníense mui serios, como si fuere un esame y d’esmenu Xira, una rapacina dispierta y gayaspera glayó:
-¡L’árbol de Navidá! -de seguío quedó seria, dubiando- ¿nun ye éso, profe?.
-Claro que sí -retrucó la mayestra- satamente l’árbol de Navidá; YULE ye l’orixe la tradición de poner un árbol nesta dómina que yá ta pa entamar y los pueblos que de siempre emplegaron los árboles pa celebrar la Navidá son los países que tán más al Norte d’Europa, los escandinavos, porque ellí n’iviernu namái tienen cuatro hores de lluz al día y entós el sol podría perdese mui fácilmente; nós, con tolos pueblos de l’Arcu Atlánticu tampoco nun esfrutamos de muncha lluz agora pero sí más qu’ellos poro, pesie caltener la tradición del Nacimientu que tamién ye guapo y prestoso enforma, pues llantamos un árbol, pero como queden pocos texos, la solución ye poner pinos anque nun seya un árbol mui afayadiegu pa Navidá...
Llarina, una rapacina abondo seria y con mui bones idees, llevantó la man pidiendo permisu a la mayestra pa falar:
-Sí, Llarina -dixo la mayestra- ¿tienes dalguna idea prestosa pa facer nós?.
-Bono, a lo meyor paezvos bien -esta neña siempre falaba mui sele y en voz baxa- ¿podríamos facer daqué asemeyao, asonsañando los nuesos antepasaos?; ¿qué te paez, profe?.
A Tina nun-y dió tiempu a retrucar porque la clas tornóse, de sópitu, un españíu de palmes, síííís, ¡qué bien, qué bien!, ¡viva Llarina!, etc, tanto, que la mayestra malpenes foi quien facer callar esa reciella entusiasmada cola posibilidá d’entamar un llabor que remembrare dómines d’abenayá cuando les persones quiciás teníen menos enfotos pero yeren más auténtiques, más humanes.
Cuando los escolinos aselaron, Tina prometió falar col Conseyu Escolar pa esplicar a les persones que lu formaben la propuesta porque como yá aniciaben les vacaciones de Navidá, tendríen de facer l’actividá nos caberos díes d’Avientu, caltener abierta la escuela y encamentar a pas y mas pa qu’ellos tamién collaboraren y...
Hebio de too; Tina atopó persones enfotaes n’echar una gabita, ilusionaes y otres que “pasaben” perdafechu pero pudieron más los que decidieron celebralo, y repetilo tolos años.
Como si durante dellos díes se viviere
un pocoñín naquella dómina.
-¿Quién dixo eso?. Ah, ya sé, ye’l trasgu la mio casa que m’aldovina’l pensamientu y repite en voz alta lo que yo pienso.Ye un revolvín, como tolos trasgos. Dos díes dempués de Navidá, el 27 d’Avientu, l’aula de práutiques de la escuela enllenóse d’escolinos, pas, mas, dalgún hermanu mayor, güelos, güeles y hasta dellos esquiadores que fueren a l’aldea pa dir a la ñeve y como d’esto nun hebía muncho, prestó-yos pola vida collaborar na xera. Cortaron tueros, picaron lleña menudo, fexeron cintes mui llargues con cachos de pelleya qu’hebía per ende de cuando fabricaron los mazcaritos de guirrios pero decataronse de que nun teníen vasinos pa poner les veles y yá nun daba tiempu a facelos, cocelos...; tando asina, mui pesarosos porque nun sabíen como iguar la situación, llegó’l chigreru p’andechar una migaya anque’l probe cuasimente nun tenía tiempu y al velos a toos tan atristayaos y saber polo que yera, saltó gayoleru: ¡Pero si a lo meyor podemos usar les llates de refrescos y zumu que me queden vacies en chigre!
Aquel garapiellu xente punxose aplaudir y el chigreru arroxó porque yera un home cenciellu y nun taba avezáu a ser una “estrella” asina qu’entainó pal chigre y volvió con una fardela apinada de llates, delles torcíes, dalgunes un pocoñín estrapayaes, pero yeren amañoses y entós daquién tuvo la idea perbona de pintales con purpurina de plata; darréu punxeronse toos al llabor y cuando finaron el resultáu foi perfechu.
La xera a comuña llantando les antorches, atropando lleña nes cruciaes, el colingar les llates tan rellumantes, tan guapes nes rames los texos y de seguío’l prender antorches, veles, fogueres, nún tapecer d’azulón y encainada curioso, tornó la viesca y los caminos nún paisax de lluz y belleza, onde les fueyes los texos inda paecíen más verdes y d’esmenu, aquel espaciu d’árboles y siendes, de fueu y maera semeyó somorguiase nún encantexamientu, aniciando seliquino una música melguera mentantu homes, muyeres, vieyos, rapacinos entamaben la danza milenaria al rodiu l’árbol sagráu: EL TEXU.
...............................................................................................................................
Anguaño, toles aldees les rodiaes, a comuña cola aldeína protagonista de la hestoria, celebren el YULE pero yá na fecha sata: cuando apaez el solsticiu d’iviernu.
ACABOSE